काठमाडौ । बागमती प्रदेशकी मुख्यमन्त्री अष्टलक्ष्मी शाक्यले विश्वासको मत नलिइकनै राजीनामा दिने भएकी छन्। प्रदेश सभामा पेश गरेको विश्वासको प्रस्तावमा मतविभाजन हुनुअघि नै उनले आज राजीनामा दिने भएकी हुन्।

‘संसद बैठकलाई सम्बोधन गर्दै उहाँले मार्गप्रशस्त गर्नुहुन्छ,’ बागमतीकी आर्थिक मामिला तथा योजना मन्त्री रचना खड्काले भनिन्।

मुख्यमन्त्री बनेलगत्तैदेखि नै शाक्य अल्पमतमा परेकी थिइन्। उनी नेकपा एमाले प्रदेश संसदीय दलको नेता हुँदै मुख्यमन्त्री बने पनि उनको दल विभाजन भएकाले विश्वासको मत लिनुपर्ने थियो।

विपक्षी गठबन्धनले भावी मुख्यमन्त्रीमा नेकपा (एकीकृत समाजवादी) प्रदेश संसदीय दलका नेता राजेन्द्र पाण्डेलाई अघि सारेका छो। अब पाण्डे नै मुख्यमन्त्री हुने सम्भावना बलियो छ।

यहाँ विपक्षी गठबन्धनमा रहेको नेकपा माओवादी केन्द्रबाट २३ जना, नेपाली कांग्रेसका २२ जना, नेकपा (एकीकृत समाजवादी) का १३ र जसपाको एक सांसद छन्।

एमाले उपाध्यक्षसमेत रहेकी शाक्य गत भदौ २ मा एमालेबाट मुख्यमन्त्री बनेकी थिइन्। यसअघिका मुख्यमन्त्री डोरमणि पौडेलले राजीनामा दिएलगत्तै उनी मुख्यमन्त्री बनेकी थिइन्।

मुख्यमन्त्री शाक्यलाई कांग्रेस, माओवादी र नेकपा (एकीकृत समाजवादी) ले विश्वासको प्रस्तावका पक्षमा मत दिन नसकिने उल्लेख गर्दै राजीनामा दिन आग्रह गरेका थिए।